最新一輯樓盤廣告劈頭就說「港島半山，早已奠定是香港開埠以來最矜貴的芳華地段。」難怪律師醫生嘈之巴閉，要特首替他們搵位入市，進駐「大戶傳奇」（廣告其中一句）。叫人買樓行遠些，腦有病呀？樓盤廣告捉到人心，字字挖空心思，誘人落搭。所以說，地產商治港，是錯不到那裏去的實況。人家精算過，食住民意條水出招，識走位取悅豪客，歡迎樓層任跳，廣告做到芳華正茂，唔買，都睇吓。假如施政報告有樓盤廣告的七成功夫，人人執番份回家，仔細考察，學到的造句像「不朽的半山光芒」，比「一步一腳印」更能刺激鬥志，針灸剛畢業的社會尖子的富貴穴位，奮發向前，往半山邁進，一步跳上六十樓未夠，更上一層樓，朝頂層風水特色戶進發。噢，這是多麼振奮人心的大志。
這個樓盤廣告完全看不到實景建築，有幀百分百歐洲味的「20世紀初西摩道豪邸風貌」的黑白照，疑幻似真。而西摩道，是不是廣告說的「1938年孫中山妻子宋慶齡選定半山為根據地」的真實史料，誰管呢。上市公司主席只會問呎價使唔使七萬，叫秘書約定風水佬實地視察，單位一定要向海，旺我全家！咦，正好如此，廣告說身處那個豪盤，擁抱摩天巨廈眺望西九文化區，可高瞻、遠眺、陶冶（克勤仔讀成治）和深思。咁好景，下屆特首無理由繼續住禮賓府食塵，一於搬竇！