審計署每年發表政府部門及政府資助部門嘅審計報告，例必引起討論，今年亦不例外。審計署批評他人，有時未必有理，記得審計署以前彈過大學圖書館浪費電力，其實圖書館不能有學生入內讀書先至開燈嘅啫，否則學生老早抗議到暈，又如曾經批評港台電視部製作費偏高，其實拍片有好多事先諗唔到嘅突發情況，經常引致特別支出。如果以《城市論壇》每一集製作費除播出時間（總共約三十三分鐘多啲），每分鐘嘅製作費當然係貴，但不可不知，技術人員早上八時前已去到維園搭景準備，加上直播控制車各類人員，出勤五小時先至可以製作半小時節目，梗係貴啦，如果計死數，唔好做直播節目嘞。
但審計署今次批評生產力促進局近八千八百幾件物品不翼而飛，價值五百四十六萬元，包括網絡系統以至伺服器，實在一新市民耳目。伺服器有成間房咁大，點會唔見咗o架？明火打劫呀？還是當做垃圾，一丟了之？每年核數師按理會takestock（盤點存貨及資產），點會睇唔到呢啲物品流失嘅呢，唔通生產力促進局嘅核數師瞌埋雙眼？審計署應該連核數師都鬧埋。
我哋在私人機構做事，未聽過呢類事件，如若發生，老闆或內部稽核去報警都似，可能公家物件冇人重視，隨便拎返屋企用都唔定。當然呢類係猜測之辭，未可當真。左丁山八八卦卦咁問一位做過不少公職嘅商人Ａ，佢話做公共機構理事或董事，幾時都驚驚哋，就係驚管理人員知情不報，管理不如想像中咁整齊乾淨，一旦發生審計署批評事件，做理事嘅就會捱罵食足死貓。商人Ａ話佢曾在某公共機構做理事，見過新行政人員上任就話唔慣用上手嘅舊電腦，要買新嘅，新電腦嚟咗之後，舊電腦去咗邊？原來未必有人理會嘅！即使有，經常愛新棄舊，唔係浪費公帑係乜？私人公司可以報警調查物品遺失，公共機構怎麼辦？商人Ａ講：「如果政府要強硬嘅話，律政司長可以公共利益為理由，報警備案，主動要求警方調查公共機構遺失資產。」咦，黃仁龍司長願唔願意咁強硬呢？如果佢肯試一次，相信公共機構啲唔起眼物品冇咁易失去。