因為《巾幗梟雄》熱爆全城，令當時飾演大奶奶的謝雪心人氣急升，接着播出的台慶劇《宮心計》，更令這位孔子第76代後人、原名孔令馥的心姐事業再創高峯，只有14集戲份的太皇太后一死，網民紛紛在留言版上留言，嫌太皇太后死得太早，難怪心姐直言：「死都抵呀！」 撰文：何慧斯
談起觀眾對太皇太后又愛又恨的反應，更有網民在網上搞追悼抱抱會悼念太皇太后，心姐謝雪心直言「死都抵呀」！她笑說：「初初無諗過咁大迴響，接到劇本之後，已經覺得劇本好正，停唔到係咁追住睇，演員係好被動，你問我做演員梗係希望多啲戲，一路鬥落去梗係最好，不過一早已經安排咗，每集都有事情發生，跟住將故事推到高峯，然後轟一聲走咗，我知道大家都好唔捨得，但係喺故事上不失為一個好安排，雖然只係短短14集，不過可以留喺大家個心，嗰種感覺真係好開心，太皇太后在天之靈都好安慰，就算幾辛苦都係值得，死都抵呀！」
大奶奶vs太皇太后
問到心姐喜歡「大奶奶」抑或「太皇太后」？她有點為難地說：「真係好難揀呀！兩個角色都好鍾意，如果冇大奶奶，大家對太皇太后唔會咁熟識，我反而覺得係代表作之一。」上次《巾幗梟雄》安排與觀眾齊齊睇結局，湊巧今次《宮心計》又有同樣的安排，心姐笑說：「人生冇幾多次可以同觀眾一齊睇大結局，嗰陣喺《巾幗梟雄》，我話過希望有機會同大家睇大結局，點知今次我又中咗，小青姐都話我好嘢，大半年內有兩次咁難得嘅機會。」
「升呢」後的心姐，工作排得密密麻麻，事業到了一個新境界，心姐當然覺得開心，她自覺是一個幸運的人，她說：「我由7歲入娛樂圈到家，我一直都覺得自己好好運，有好多機會。」其實心姐08年未加入無綫之前，曾經與亞視合作多年，可惜星運平平，心姐聽罷後有一番感受，她說：「可能因為自己係教徒，唔需要有感觸，會平常心去面對，各有前因莫羨人，千祈唔好人比人，最緊要抱住一個心態，你熱愛份工作，好努力去做好每一件事，任何工作我都會好珍惜，珍惜現在一剎那，要識得欣賞同感恩。無綫係收視高，相對係會多人睇，呢個係好條件之一，我07年約滿亞視，年尾演出無綫製作宣傳嘅舞台劇《王子復仇記》，當時同馬浚偉、謝天華合作，因而結下緣份，有時緣份嘅嘢好奇怪，任何行業都一樣，人生唔需要作緣份嘅強求，要到就到。」
感激恩師任姐、仙姐
今年心姐更憑《巾幗梟雄》獲提名角逐「最佳女配角」，假如成功得獎，絕對是錦上添花，心姐笑說：「咁梗係最好嘅一件事，公司俾咗個好好機會我，公司話我有份提名最佳女配角，收到封信嗰陣好似攞咗獎一樣，感覺仲好似當年醫生同我講：「太太你有咗呀！」我仲將封信擺咗喺床頭去勉勵自己，用心同努力去做每一件事，原來觀眾知o架！」
心姐又說：「有人問我如果得獎，我會多謝邊個？我咪話一定會多謝我嘅恩師任劍輝同白雪仙，佢哋賜咗『謝雪心』呢個名畀我，帶我入行，冇佢哋根本冇跟住嘅路，根本冇今日嘅我。今年被提名嘅對手個個都好好，無論邊個攞都係實至名歸，有競爭先有進步。」
至於下一個目標，心姐想了一會說：「粵劇、舞台劇、主持、電視劇、電影好多嘢都試過晒，或者喺電視上可以試吓做一啲善良嘅角色，幫我平反吓。」
