【上月燈神】
戰友牽牛雖然平日口花花，其實都係個性情中人，佢早排搵啲紅磡（小弟成長地方）舊觀、懷舊食品嘅相畀我睇，引發不嬲古老當時興嘅我頻頻搵啲懷舊網。結果搵搵吓，搵到去啲童年電視節目資料，好自然搵到《430穿梭機》，同埋當年節目主持KK。
KK喺我心目中都係一個幾多瓣數嘅人物，當年除咗踢過波、做過兒童節目主持，仲曾活躍於電影圈，《波牛》、《點指兵兵》兩套戲，怕且就算未睇過都聽過。早幾年見佢客串講波，有見地又識搞氣氛，不知好過嗰啲唔係死背數據，就係搞爛gag嘅講波佬；到近日，佢就喺套人氣劇飾演一個大將軍，畢竟有演戲底，如果你問我，我覺得比幾個花旦仲出色。
一個人瓣數多，無論身處任何環境都唔憂冇得撈，好似國米隊長辛尼迪，經歷國米幾朝變化仍然吃得開，聽講早幾年搞餐廳生意有聲有色，同時發財立品成立慈善基金，做人做到咁都算無憾咯。
今周我熱捧佢隊波國米贏費倫天拿，希望都無憾。
藍鑽石
近5場往績：LWLWL
主客和：國際米蘭勝
心得：請信我單跳攤路