香港旅遊業議會喺啱啱過去嘅星期三舉行會員大會，選出新一屆理事會成員。康泰旅行社董事黃進達力壓其餘四位參選者，以651票全場最高票當選新一屆理事。黃進達來頭唔小，老竇係康泰老闆黃士心。不過，黃公子今次得票贏晒啲世叔伯，卻引起部份業界人士不滿，有人仲質疑選舉公正性，務求要推翻結果咁話。
議會總幹事董耀中噚日向八方承認，收到一間旅行社投訴，質疑黃進達高票當選係咪有蠱惑。投訴人懷疑其中兩間旅行社派出唔合資格嘅人投票；立法會旅遊界代表謝偉俊都有去信議會，關注事件。
投訴初步唔成立
不過董耀中話，經過調查，被投訴嘅兩間旅行社分別派公司股東同經理投票，無違規，投訴初步唔成立。
有議會理事同八方講，黃進達年約30歲，雖然資歷尚淺，但長江後浪推前浪，應該畀啲機會後生仔。不過亦有人認為佢未夠班，仲擔心爭埋個主席位嚟做。議會下星期三就會選新一任主席，議會中人話黃進達一定唔會去馬，最終應該係葉慶寧同胡兆英之爭。葉慶寧曾經同謝偉俊、董耀中爭過立法會議席落敗；胡兆英就係旅行社協會主席。