今年金管局先後有管理層退休，先有前任總裁任志剛喺9月底卸任，副總裁蔡耀君（人稱YK）亦會喺今年底退休。身兼香港銀行學會副會長嘅YK，噚日喺學會會議上發表演說，開場前都難免有啲依依不捨，事關今次係佢最後一次以金管局副總裁兼銀行學會副會長身份，出席同類場合。
YK從事金融監管工作接近35年，退休後又會點樣享受人生呢？答案就係YK計劃去讀歷史，就連佢本人以前都冇諗過讀書揀歷史呢一科；經歷舊年金融海嘯後引發軒然大波，加上年紀漸長，佢發覺「歷史」非常重要，希望修讀歷史，借鑑歷史教訓、總結前人經驗，避免再犯同一個錯誤咁。
YK打滾金融界咁多年，邊段歷史係令佢本人上咗最寶貴嘅一課呢？唔知係咪雷曼迷債事件？華華希望能夠喺佢退休前傾吓，到時再同大家分享。