許冠傑（阿Sam）與許冠文（Michael）的母親許李倩雲剛於周日（22日）病逝，享年89歲，在她彌留時，所有兒孫都到醫院送別最後一程，雖然許媽媽走得安詳，但阿Sam送別母親時，還是忍不住淚灑病房。
許冠文、許冠武、許冠英和許冠傑四兄弟是出名的孝順子，在父親許世昌91年病逝後，他們更疼錫母親，每周會輪流陪伴母親飲茶和吃飯。早前許媽媽身體不適，被送往將軍澳醫院，許家上下均前往探望，至周日（22日），許媽媽終與世長辭。雖然是笑喪，但面對要跟媽媽永訣，許氏四兄弟難免憂傷，特別是最疼媽咪的阿Sam和Michael就最不捨。
囑喪禮低調進行
昨日記者致電許冠文太太，許太證實奶奶許李倩雲仙遊的消息，她說：「奶奶近年多病，大家早已經有心理準備，今年奶奶都成90歲，過身都係笑喪，臨終前兒孫都去晒醫院送佢，老人家去得好安詳。Michael佢哋幾兄弟係好錫媽咪，但明白生老病死係人生必經階段，所以都接受到呢個事實。」
問到許媽媽何時出殯？許冠文太太說：「家大家喺度開緊會，仲未定到日子，不過奶奶生前已講到明唔想搞得咁高調，所以我哋會尊重佢遺願，一切低調進行。」
許懷欣永記嫲嫲
許懷欣昨日接受電話訪問時，也證實其嫲嫲於周日晚過世，他說：「嫲嫲成90歲，係笑喪，佢係因為老人家機能衰退而離開，嫲嫲係信耶穌，家佢返咗去主嘅身邊，之前成家人會聚埋一齊食飯同嫲嫲傾偈，我會珍惜呢啲日子同掛住佢，而嫲嫲臨終時有個心願，就係唔搞喪禮。」
採訪：葉雪
