香港樓市升到㷫烚烚，花旗國樓市仍然冇起色，高盛老總布蘭克費恩（圖）都要向現實低頭，割價賣樓。佢間位於紐約第五大道嘅豪宅，放盤5個月都賣唔出，惟有劈價一成至1350萬美金放售，希望有人垂青。
惟有劈價一成放售
不過，大家唔使為布蘭克費恩肉赤，因為今年美股強勁反彈，高盛喺股市斬獲甚豐，早排有報道話今年高盛已預留咗170億美金派發花紅，估計員工平均年薪達71.7萬美金，仲打破07年大牛市嘅紀錄，亦係高盛開業140年以嚟最多。
布蘭克費恩07年就分到6900萬美金花紅，咁今次咪肯定過7000萬，呢次賣樓少賺百零萬，對佢嚟講當然濕濕碎啦。家陣布蘭克費恩住喺曼哈頓最貴嘅大廈15CentralParkWest，係佢喺07年用2700萬美金買入o架。