無綫劇集《宮心計》描述宮中生活，角色戲份雖分佈平均，然而在觀眾眼中，奸角往往率先跑出，關菊英今次飾演的阮翠雲正好引證好人難做，由於她過往飾演的細契和Sa姨均很搶戲，反觀她在《宮》劇中的風頭被其他奸角蓋過，令菊姐要多花心思演繹內心戲才能取悅觀眾。
撰文：卓寶花
關菊英07年再戰娛圈，重投無綫大家庭，遇上好劇本和好拍檔，夥拍一眾實力藝人如李司棋和夏雨等演出《溏心風暴》，其細契一角令菊姐創出演藝生涯另一個高峯，其後她在《溏心風暴之家好月圓》中飾演的Sa姨角色雖然奸，但透過她生鬼演繹，依然討好。
「奸角永遠出位」
今次在《宮心計》中，菊姐飾演的阮翠雲個性善良，只跟米雪飾演的鍾雪霞大鬥法，菊姐日前說：「我第一次拍古裝，起初好擔心，做手同媚態我完全唔識掌握，因為劇中好似惠英紅同米雪個個都好有經驗，最初導演都話我太誇張，後來係佢哋教我先慢慢改善。」
成功的奸角為藝人帶來極大迴響，《宮》劇角色戲份雖然平均，但實際上今次菊姐飾演的阮翠雲，角色比起其他奸角不夠奸，焦點自然落在咄咄逼人的米雪和楊怡身上，菊姐對此說：「奸角永遠都係出位，夠爆，講說話都大聲啲，好人永遠都係俾奸人踩住上，唔可以全部都奸，我哋唔係為搶戲而做戲。」
今次轉型對菊姐來說也是新嘗試，她說：「之前細契同Sa姨角色已經好有爆炸性，今次要有變化，反而內心戲花多咗心思。」相對劇中其他對手，菊姐要突圍而出有一定難度，她說：「雖然係忠，但劇集都要講劇情，有劇力先有發揮，令觀眾有共鳴。」
難忘牢獄中受苦
首次拍古裝劇，菊姐很緊張外間反應：「我第一次拍古裝有好大壓力，最難係鬧交時都要有儀態，對白又唔可以NG，髮飾又好幾磅重，大家都做得好辛苦，劇集出街後大部份人都係讚，對我嚟講係好好嘅經驗。」
談到難忘場面，菊姐記憶猶新說：「有場戲講我同米雪被拉入天牢，面對幾乎斬頭嘅時候，其餘兩房人跪地幫我哋求情，場面好感動，監牢入面又要受杖刑，打patpat，夾手指，呢幕令我好深刻。」
睇好雯女封視后
台慶頒獎禮將至，關菊英反而看好《巾幗梟雄》中鄧萃雯飾演的四奶奶，她直言：「唔使諗啦，應該係雯女，事實佢努力咗好多年，係實至名歸。我唔係覺得楊怡唔好，但有呢套在先好難揮。」今年菊姐無緣競逐女主角獎，只入圍最佳女配角，她表示有信心奪獎。
攞獎忌太快
菊姐早年也曾獲提名女主角獎，惜未能如願，她對此說：「就算舊年畀個女主角獎我，都唔係時候啦，會弄巧反拙，反而我想拍多幾套，慢慢俾觀眾認同，到時獎項先嚟得合時，如果突然咁快，會快來快走。」
