香港女性嘅社會地位相當高，不過原來喺職場上要攀上權力頂層，相對於歐美國家仍然處偏低水平。據非牟利機構公益企業向42家恒生指數成份股上市公司調查顯示，只有8.9%嘅董事職位由女性擔任；而女權地位最高嘅成份股，竟然係中國建設銀行（939），17名董事中有5位係女性。
33%成份股無女董事
至於掌握最高權力嘅上市公司女董事，要算新地（016）主席郭老太，第二位就係恒生銀行（011）副董事兼行政總裁梁高美懿。
公益企業創辦人ShaliniMahtani話，香港女性董事百分比只有8.9%，相對於英國11.7%、美國14.5%同加拿大15%為低。
另外，香港成份股中33.3%嘅董事局係完全冇女性代表。
調查分析，女性董事比率偏低嘅原因，係女性人才有限，香港仍然係男性主導社會，以及女性由於家庭責任，自願放棄高級職位；仲有因為女性人際網絡往往唔及男性，因此經常不獲考慮出任董事職位。
佢話歐洲一啲國家甚至立法或者推出配額，規定上市公司嘅女性董事要佔相當比率，不過，今次調查中受訪嘅女董事大多唔贊成呢個方法，女董事認為，應該喺教育同推廣董事會性別多元化方面多做工作咁話。
李華華
恒指成份股女權排行榜
‧1.上市公司：建設銀行（939） 女性董事比率：29.4%
‧2.上市公司：中國銀行（3988） 女性董事比率：20.0%
‧3.上市公司：長江實業（001） 女性董事比率：19.1%
‧4.上市公司：中國人壽（2628） 女性董事比率：18.2%
‧4.上市公司：華潤電力（836） 女性董事比率：18.2%
‧4.上市公司：香港鐵路（066） 女性董事比率：18.2%
‧7.上市公司：太古（019） 女性董事比率：17.7%
‧8.上市公司：平安保險（2318） 女性董事比率：15.8%
‧9.上市公司：中銀香港（2388） 女性董事比率：15.4%
‧9.上市公司：和記黃埔（013） 女性董事比率：15.4%
資料來源:公益企業