王喜噚日去咗將軍澳電視廣播城擔任《星級廚房》嘅嘉賓，佢同周中師傅喺現場表現得老友鬼鬼，仲不時交換入廚心得。王喜一向俾人好住家男人嘅感覺，雖然佢喺節目度煮咗幾味餸，不過佢好坦白話：「我唔係入廚高手，平時好少下廚煮嘢食，反而係叮叮高手，最鍾意用微波爐叮嘢食。」王喜更笑稱屋企嘅廚房幾乎變成雜物房，雪櫃亦只係擺面膜同藥物。