恒盛地產（845）慘痛經驗重演，散戶求神拜佛抽中民生銀行（1988）幸運兒唔係我，因為只得三成中簽率，應冇咁黑仔。不過孖展朋友分多咗直頭想爆粗，昔日高調撐民行上市嘅大孖沙亦即時潛水，唔知去晒邊。
無獨有偶，同樣上市兩日就潛水的有花樣年（1777），咁啱又係某君「賣飛佛」，即使佢喺民行上市前堅稱定價雖貴，但作長期持有係最佳選擇，都幫唔到民行浮水。原來「短炒變長揸」並唔係散戶專利。
早前新股大賺，佢話下半年投資重點係抽新股，結果成為新股路演常客，可惜老貓總有燒鬚時，今年佢力捧嘅7隻新股，4隻潛水，難怪有跟足一條龍嘅網友，大吐苦水話信錯人。
死守潛艇不如另覓投資
不過散戶唔得咁輸打贏要，佢推介都有好嘢，就係國藥控股（1099），比招股價升63%，即使係受賬目問題困擾嘅中國金屬再生（773），認購揸到家都賺64%，只係隻中國全通（633）仍被點穴，冇乜表現。統計完戰績，就不能一棍打沉，其實跟佢買唔一定輸，只能話平均破發率係七分之四，即係57%，但睇中贏錢的話，卻有超過六成回報。當然咁計係好唔科學化，但投資者可以見到大基金都唔係必贏，所以參考專家投資意見時，不妨好似計NBA球賽入球命中率咁，幫各大孖沙評吓分。
避過民行一劫，係由方風雷主理嘅厚樸基金，雖則推介會時都見佢身影，但原來佢哋臨門一腳冇入飛，認為定價太貴。中銀大錢莊出身嘅方大俠，現時私募基金管理資產超過25億美元，背後仲有新加坡淡馬錫控股同高盛支持，最近仲搵埋小布殊年代駐華大使雷德做特別顧問。方大俠鍾情大大隻嘅股份，基金倉有中國銀行（3988）、建設銀行（939）同蒙牛乳業（2319）等。總之大俠話貴就一定係貴，其他人話又抵又平就未必係咁筍。
投資者跟風向唔緊要，但就要醒目睇勢，收錯風企錯邊都千祈唔好「磨爛蓆」，要是新股首日表現未炒起，幾日內仲要破底，與其死守，倒不如沽貨離場再喺其他奇葩身上報仇。
胡孟青