政府噚日宣佈委任行會成員、紡織界女強人「棉花公主」楊敏德（圖）做理大校董會新主席，任期三年，由明年1月1日起生效，取代「電池大王」、金山工業老闆羅仲榮。
羅仲榮做理大校董會主席六年，夠期換人；佢任內最廣為人知嘅，可能係好多學生同工人團體向佢抗議，批評佢旗下工廠生產電池過程污染環境，影響工人健康。教育局局長孫明揚指羅仲榮對理大持續發展有重大貢獻，喺以應用為主嘅教學上取得長足進步。
楊敏德今年初獲煲呔委任晉身行會，為人低調，相信比較多人知佢係潘迪生嘅第一任妻子，佢係MIT理學士（數學），又有哈佛MBA，相信同理大「加州幫」夾得來。