家長A睇《經濟日報》以大篇幅報道「美社區學院，港生赴美首選」，急忙打電話嚟問：「喂，左丁山，報道話考托福肥佬，都可入讀社區學院噃，係唔係？」左丁山好耐已經冇寫過呢個題目，但幾年前電腦J以為有錢搵，叫左丁山做顧問，聽計派夥計飛去加州做實地訪問，去過「名校」Foothill&DeAnza，出版咗一本幾厚吓嘅《美國社區學院全攻略》，以為賣得，誰知榮登教育書類「暢銷榜」，夠巴閉喇啩，都賣唔到二千本，慘淡收場！後來有內地大學買咗簡體字版權，在內地出版，至於銷量如何，冇心機去問。
點解傳媒突然對美國社區學院有興趣呢？唔知道，但今明兩年適逢加州大學、加州州立大學因州政府削減預算，加學費，裁員減薪，搞到大學生示威抗議，加州大學系統似有走下坡甚至「海嘯」現象，而社區學院亦係州立嘅，認真難搞。財困之時就會向錢看，加州大學招收明年學生，因外國生要交國際學生學費，接近三萬美元一年，可能會鬆手啲啩？但負面因素就係教授士氣大受打擊，會下堂求去，教學質素必然比以前遜色。
講番社區學院，係要考托福嘅，只不過係要求標準低到五百分（舊制）左右啫，譬如最出名嗰間Foothill，就有好多香港學生，才女T位公子就因為係超班馬，GPA爆燈，讀咗兩年，今年就直入UCLA讀三年級，凡新生都要考一次評核試，高於標準者可直接修讀英文A及英文B，呢兩科合格先至得到加州大學承認，否則要重讀，如評核試不達標，就要修一至三科ESL（英文為第二語言），修得嚟，可能已經要三個學年，一般托福試成績麻麻嘅，都被逼走呢條路。
美國朋友教授L對社區學院最熟悉，幾年來傳來不少電郵講社區學院，資料多到睇唔晒，例如西雅圖之Shoreline二年制畢業生可以升讀華盛頓大學三年班，但華大因財政困難，曾要求獲取錄嘅學生延遲半年至一年先至入學。如果家長有錢，唔使一定要讀州立大學嘅，直情可以用社區學院嘅成績申請私立大學，例如南加州、聖母院等，途徑甚多。但聽過才女T講，Foothill已有人滿之患，後來者怕冇咁好彩咯。