江若琳將會喺出年1月5日喺九展舉行處女個唱，佢噚日去新城接受訪問話一開始公司話幫佢搞演唱會時，就覺得願望達成。江若琳話：「我興奮到由腳底開始毛管戙，家啲衫開始做緊，未知性唔性感，仲搵咗容祖兒個健身教練幫手，到時可以騷身材。」江若琳家瘦咗8磅，阿媽又買冬蟲草畀佢補身，但佢最想嘅係請到偶像羅志祥做嘉賓。