股海之奇，真係乜事都可以發生。昨日最惹散戶談論之股份，當然係介紹形式上市之亞洲果業（073），股價高開51.25元之後就拾級而下，有幾多散戶撲入撈底，星俠唔知，不過就知同場炒股某位仁兄在20元左右買入，之後股份仲停埋牌。星俠問佢驚唔驚？佢話由高位跌咗咁多，仲有乜好驚？
呢位仁兄EQ咁高，當然希望佢能夠贏錢。事實上，新股猶如一張白紙，買入之後股價點走，散戶只能靠估，惟有自求多福，將風險控制在自己能力範圍之內。投資市場潛在高風險，任何時候都要打醒十二分精神。
有關內銀股提升資本充足率的消息，嚴重打擊中港股市氣氛，呢件事一日未明朗，對港股後市始終係隱憂，至少淡友有借題發揮的藉口。
揀股炒係淡市中一條出路，內需股不妨望多兩眼。李寧（2331）於月中成功突破25元後，走勢反覆向上，昨日逆市造好，曾升破52周高位27元，最高見27.30元，收報26.80元，升0.75元。港股氣氛轉差，李寧可候10日線附近買入，目標32元，跌穿25元止蝕。
方星俠