廢柴政改方案出爐，泛民狠批不知所謂，首當其衝可能被褫奪投票權嘅委任區議員亦好有意見，批評政府過橋抽板，不過未開火已經收晒聲，各區委任區議員仲陸續刊登廣告，表態支持政改方案。八方嘅老友透露，多得中聯辦幹部向委任區議員做大量思想工作，叫佢哋大局為重，唔好添煩添亂，其中九龍工作部部長林武可以話最落力，有人指林武十分進取，日後中聯辦有人事調動，副主任人選有變，唔好睇漏佢咁話。
話雖如此，亦有人指林武今趟搶閘㩒實委任區議員可能有手尾，事關西環最高層對是否支持褫奪委任區議員投票權建議未最後拍板，貿然表態日後無彎轉，有人可能要孭鑊喎。