俗語有話扮豬食老虎，不過，外號「老虎」嘅英超球隊侯城，就鍾意「扮病貓食拖肥」，喺日前場英超迎戰愛華頓賽前就示人以弱，點知接戰下之先回復猛虎本色，以3:2勝出，嗒咗呢粒「拖肥糖」。
菲爾布朗牙擦擦
侯城上屆戰至最後一場聯賽先成功護級，今屆球隊表現依然冇大起色，頭7場聯賽輸咗5場，連會長杜芬都因為撐帥位危危乎嘅領隊菲爾布朗而辭職，搞到外界睇死呢支中部球隊，喺周三嘅英超聯迎戰愛華頓，侯城又有後衞文迪停賽，因此就算侯城之前連續兩場主場聯賽都搶到分，球迷都唔覺佢哋掂，大部份睇好「拖肥糖」可以反底。
點知踢咗唔夠30分鐘，侯城已分別由史提夫亨特、唐臣及馬恩尼嘅入球，遙遙領先3:0，雖然愛華頓最後連追兩球，但侯城最終以3:2勝出，近3場聯賽共取得7分，以14戰得15分升上第15位，逐漸遠離降班漩渦；如果呢隻老虎保持呢個勢，真係有望保住個超聯席位，而領隊菲爾布朗賽後仲牙擦擦咁話：「當球隊被追成2:3時，其他人可能好擔心，但我就冇有怕，因為我覺得球員表現好好，知道我哋一定會贏波。」
拖肥搵紅軍反底？
至於愛華頓，連埋呢場輸波，佢哋喺近10場只係贏過1場，家同侯城同得15分，不過愛華頓領隊莫耶斯賽後就好堅決咁話唔會辭職，當有記者話聽到喺默西賽德有傳言話佢會下台時，莫耶斯仲好串咁話：「乜你住喺默西賽德咩？」並唔係我求大俠危言聳聽，不過最弱勢嘅球隊通常都會搵強隊嚟反底，唔通愛華頓就係等下場（下周日）默西賽德打吡、等兩大中場主力比耶列甸洛夫同埋費蘭尼停賽期滿復出，先至嚟反底贏利物浦？