容祖兒（Joey）早前為百老滙代言嘅電視廣告被網民踢爆抄足07年嘅微軟產品廣告，最近馮仁昭都唔多見個廣告喺電視上出現，原來Joey日前已飛咗去日本為廣告商拍攝新一輯廣告，今次仲好揼本飛埋去日本拍攝，相信經過上次教訓之後，「A貨廣告」唔會再出現。
由於今次Joey要利用3日時間拍攝4個唔同版本嘅廣告，兼順道拍埋新歌MV，所以今趟行程都非常緊湊，不過Joey卻絕冇怨言，仲得到廣告商嘅愛錫，連容媽媽都獲邀請到日本陪Joey，所以Joey一趁空檔即抽時間同媽咪四圍拍照留念，順道共享天倫之樂。
險漏低阿媽
今次拍攝嘅景點眾多，除咗東京之外，Joey仲走訪埋原宿、澀谷、六本木、表參道等地方，所以拍攝時都烏龍百出，話說有一場係講Joey喺火車站，因為要遷就火車嘅班次，所以佢哋就要跟火車坐到尾站，但當火車準備再開動嗰陣，Joey先發現媽咪竟然唔喺車上，嚇到佢連忙大叫，幸好容媽媽最終趕及上車，Joey即話：「好彩媽咪上到車，唔係佢就要流落異鄉。」
