華叔唔支持總辭公投，俾社民連鬧到體無完膚，卿姐同華叔站在同一陣線，噚日喺理工大學一個討論政改諮詢文件嘅論壇上，為華叔辯護。卿姐指華叔並非唔支持民主，也不是反對爭取普選，只係喺方法同手段方面同其他泛民有唔同睇法，據卿姐講，華叔強調唔係任何方法都受市民接受，即係好似有人建議裸跑爭取普選，都可能有人覺得係一個可行方法，但係市民會唔會接受呢？如果用啲大家都接受唔到嘅方法，行唔通嘅。
學華叔講反話
出席同一論壇嘅公民黨梁家傑就話，如果華叔真係認為裸跑係一個爭取普選方法，公民黨會企埋一邊支持華叔拋開一切、無拘無束咁爭取民主，公民黨甘拜下風咁話。華叔梗係唔會裸跑爭普選啦，八方相信梁家傑都係學咗華叔講反話啫，華叔月前忽然點名梁家傑參加總辭，搞到好多人以為華叔都撐公投，原來佢正言若反，話唔定梁家傑都係跟華叔學嘢，講吓反話啫。