【我哋有say!】
為咗今次東亞運足球賽，足總早喺年幾兩年前，已成立23歲以下（U23）代表隊進行訓練，我亦係其中之一，足總仲搵埋曾喺香港踢甲組嘅克羅地亞教練高能執教。球隊成立不久，操了幾個月，在球季結束後，便拉隊到克羅地亞集訓超過兩個星期，其間打過幾場友賽。
返港後以為會繼續訓練，點知完全停操；諗住就算教練走咗，都應該操練備戰，始終東亞運係四年一度，又喺主場出戰。不過之後又聽到足總話可能唔用23歲以下代表隊，因為會放寬參賽限制，不限球員年齡。
與中韓同組唔易踢
搞咗一輪，足總最後決定用23歲以下代表隊，但在個別位置補充了大港腳，而早前正式公佈嘅東亞運球員名單，與兩年前去克羅地亞集訓嗰一隊有好大分別，差不多有一半球員唔同咗，教練亦由高能改為金判坤，作為球員確有無所適從感覺。
由於兩個帶過東亞運嘅教練都係進攻球員出身，所以踢法上都傾向進攻，但球隊喺分組賽會對住南韓同中國，就算對手唔係大國腳，只派青年軍，以港隊的實力亦應該冇條件去攻人。希望賽前呢段時間，教練可以安排多啲訓練俾我哋防守球員，令球員知道真正比賽時應該點去防守對手。
同組得3隊波，兩隊可以出線，和一場已經有機會，但都要識守先至和到波o架。無論點，球員都會盡力而為，始終主場出戰唔想令主場球迷失望。
東亞運足球運動員──陳韶遠
年齡：22歲
現效力球會：四海流浪
轉職業年份：2004年
位置：中堅、防守中場
威水史：港青、香港東亞運代表
知多啲︰火炬接力跑
為慶祝今屆東亞運動會100日倒數及國慶60周年，今年8月29日舉行了火炬接力傳遞，當中有65名火炬手參與，傳遞路線全程10.2公里；單車好手黃金寶當首名火炬手於九龍公園出發，最後由「風之后」李麗珊（圖）在灣仔金紫荊廣場燃點最後一棒而結束。
Tagit!︰地標
蒸餾水將東亞運參賽國家或地區的「地標」印在樽上，中國的鳥巢（右二）取代了長城，不知香港（左一）東亞運後會否有運動場館取代夜景呢？
徐嘉華攝
