曾幾何時，除了英超外，便鍾情睇西甲，感覺上這個聯賽是崇尚進攻、技術、不難發現精采的小組入滲，就算巴塞隆拿、皇家馬德里的比賽於凌晨5點開波，照樣睇埋，皆因從來入球不少，甚少冷場，睇完剛好天光，然後食個早餐。
能夠吸引到費高、施丹及朗拿度等世界頂級球星，的確令到西甲一直在足球技術水平上勝過較為講求速度的英超，就算這類技術型球員效力的不是巴塞、就是皇馬，無論對那隊都一樣精采；亦因為西甲球隊唔太着重防守，所以就產生了令人難忘的金球，朗拿度半場爆發盤球入波、李華度的「李三腳」倒掛金鈎，仲有施丹對拉科魯尼亞的搓前車後的妙絕入球。
欣賞巴塞攻擊模式
今周又輪到西班牙「國家打吡」上演，本港球迷總算趕得切有直播睇，同時間有美斯、基斯坦奴朗拿度及卡卡3大球王在陣對決，單是球星號召力已是極之吸引。技術層面上，筆者始終欣賞巴塞隆拿的攻擊模式，可能與以往該隊一直有一位極出色的進攻核心人物有關，就算是上一代的朗拿甸奴，同樣將巴塞的進攻足球發揮得淋漓盡致；當然，筆者到過魯營也有幾分情意結……
期望皇馬教頭比歷連奴不會為保烏紗，而放棄與主場的巴塞隆拿鬥攻，否則失望的將會是球迷！
戰鬥員A
本報名家
電郵：mailto:[email protected]
逢周二、五見報