滙聚炒房專才嘅財資市場公會（TMA），每年都會搞一趟同業餐舞會，今次就特別熱鬧，華華聽聞，佢哋今晚會喺灣仔會展中心舉行名為懷舊金曲夜嘅晚會，門票銷情仲盛況空前，唔知同今年嘅表演嘉賓，由金管局及按揭證券公司高層夾Band組成嘅無敵陣容有冇關係嘞。
以往TMA搞Ball，會請擅唱英文歌嘅歌手助興，好似陳潔靈、肥媽瑪利亞咁，年輕啲嘅亦試過古巨基，今年雖然都請咗「空櫈」夏韶聲做嘉賓，不過聽講「馬膽」唔係別人，乃金管局歌王兼助理總裁阮國恆，同埋吹得一手色士風嘅副總裁Peter彭醒棠，聯袂按證公司高層Band友領軍嘅樂隊主打。
Peter任職按證公司總裁期間，經常同下屬夾Band，仲定期搞民歌比賽，據聞佢嘅飲歌係「WonderfulTonight」，唔知賓架們有冇耳福呢？