法國踢愛爾蘭出局，晉級世界盃決賽周，全憑「上帝之手」眷顧，以後亨利會與馬勒當拿齊名，成為世界足球史上最著名之騙子。法國在世界盃外圍賽，表現甚差，踢附加賽對住愛爾蘭，第一場作客憑安歷加一個符碌入球贏一比零，返回巴黎主場，竟然佔唔到上風，輸咗零比一，到加時嘞，所有電視鏡頭都睇到亨利用左手碰球，等個波唔好出界，然後用左腳勾波傳中畀加拿斯門前頂入。點解偏偏球證旁證睇唔到手球，判入呢？如果用美國方法，球證立即睇重播，呢球一定判唔入，但國際足協好頑固，堅持人為（球證）錯誤係足球比賽一部份，令球賽更加刺激及不可預測喎，係唔批准採用美國手法，於是不幸之一方（如愛爾蘭、如費格遜時時鬧球證）唯有頂住條氣。
亨利肯定知道佢用手碰球，故此賽後與愛爾蘭隊長鄧尼坐在草地，安慰鄧尼兼且承認手球，不過加多一句：「係波打手，而且我又唔係球證！」英文有一個辭，就係LuckoftheIrish，但愛爾蘭連續兩場失運輸畀法國，弄成兩國政治風波，愛、法總理隔海交鋒，以後呢個辭不如改為LuckoftheFrench。
亨利唔犯手球嘅話，不等於愛爾蘭會晉級嘅，場波好可能以十二碼分勝負，邊個會贏，無可預測，但眾目睽睽之下，全世界都知道法國靠欺騙過關，亨利與法國失晒形象，問心有愧，明年踢南非世界盃，法國球迷要多啲去聖母院祈禱至得。
紙上談兵，現在就落注嘅話，二○一○年世界盃決賽應該係西班牙對巴西，巴西踢世界盃決賽最有經驗，睇高一線，其他隊伍陪跑者多，阿根廷、意大利、德國、英格蘭、荷蘭、葡萄牙等等唔似有冠軍相。香港最多英格蘭擁躉，酒吧老闆最希望英隊殺到入四強準決賽，未必冇可能嘅。英隊教練卡比路計劃周詳，一年前已卜定南非操練基地，訓練營內照足佢嘅構思建造，現時更要球員接受高原缺氧訓練，體能唔好嘅，一定要out，可惜吖，球員質素所限，英格蘭頂多入四強。