夠Car事：廣州車展直擊　谷新車靚女淋沙

今年廣州車展嚇人一跳，福士集團揮軍南下，向龍頭車廠挑戰，展館搞到又大又靚。連凌志、寶馬、積架新車都快過香港有得睇，仲要梗有一個喺左近嘅省鏡RacingQueen，靚車靚人叫人目不暇給。以往全亞洲最吃香嘅東京車展，下屆真係危危乎。

記者、攝影：龍影子
鳴謝：VolkswagenHongKong

■發佈會上，福士集團靚車加高層晒冷Show。

■呢張相只係影到會場一半，但已經夠你行到嗌救命。

福士強陣南下

今屆廣州車展真係驚喜連連，6個展館各有上下兩層，佔地同規模唔差得過日本嘅幕張，靚車靚女又特別多，行一圈已經要兩粒鐘。自從跟保時捷合併後，福士集團聲勢大壯，林寶、Bugatti、賓利、Audi同福士，閂埋門一家親，要貴要豪要快要抵乜都有，喺北方早已係龍頭，今年就藉廣州車展宣佈向華南地區發力，香港係第一站，更揚言2010年要進佔香港銷售首位！寸？抵佢嘅，你睇福士集團連埋Audi同Skoda，霸咗大半個場館，Scirocco、EOS、Polo、甲蟲大晒冷。對住架祖國生產嘅Golf1.4TSI同GTI驗屍咁驗，由車殼到內櫳工藝都相當優異。最出人意表嘅係，介紹新車仲配埋精采「沙中舞」表演，細沙傾瀉伴隨優美舞姿，好有特色。