世界盃每屆除咗有指定吉祥物，亦有代表人物，好似巴西嘅「大哨」，連續4屆參加決賽周，贏過兩次冠軍同一次金靴獎；原本33歲嘅「大哨」願望踢埋南非世界盃後就收山，但教練鄧加周二接受當地電視台訪問時，就正式粉碎佢嘅5屆世界盃夢。
鄧加都好決絕咁回應唔會召「大哨」踢世界盃：「朗拿度唔會去南非，甚至包括巴西嘅友賽；有啲球員唔需要國家隊試練。我不想大家誤會，也不想重蹈覆轍。」鄧加口中嘅覆轍，就係前教練彭利拿，徵召當時超重嘅大哨，踢06德國世界盃，結果巴西8強負於法國出局，未能衞冕。不過我大俠就認為，鄧加將上屆失敗嘅責任，賴晒落大哨度，就有啲唔公平。嗰屆世界盃，老化嘅唔止係「大哨」，仲有卡富、卡路士、薛羅拔圖。「大哨」假假地嗰屆都5場入3球，係巴西該屆首席射手。
回流巴甲一樣唔失禮
先唔講「大哨」之前踢國家隊嘅豐功偉業，今季回流巴西發展，加盟哥連泰斯，19場巴甲比賽入12球，仲贏埋巴西盃。鄧加當「大哨」係草，巴塞隆拿球迷就當佢係寶嘞；事關下周日西甲就上演國家打吡戰，巴塞隆拿主場鬥皇馬。巴塞球迷預備橫額同T恤，「明讚」大哨，「暗踩」基斯坦奴朗拿度。橫額內容就係「這裏只有一個朗拿度，但不是葡萄牙人。」朗拿度97年離開巴塞，球迷仍然對佢咁尊敬，相反舊隊友就踩到盡，唔心淡就假嘞！