陳慧琳（Kelly）自從愛兒劉昇出生後，事事以兒子為先，下月是她榮升母親後的首個聖誕節，她已準備好推卻工作把時間留來陪伴兒子，若聖誕當天不冷，還打算帶兒子出外報佳音，度過一個難忘的聖誕夜。
陳慧琳前晚現身又一城擔任聖誕亮燈儀式嘉賓，談到難忘的聖誕，Kelly表示記憶中沒有，希望今年將會發生，因為家中多了新成員劉昇，她說：「我想帶個仔出去報佳音，睇下凍唔凍先，我怕凍親佢呀。正日我推晒啲工作，係之前之後有啲嘢做。」
Kelly又表示已準備好聖誕服飾給兒子穿着，又有聖誕樹及聖誕襪，她說：「我會放啲奶粉入去聖誕襪度送畀佢，因為佢只識得食。」她也沒忽略老公，Kelly說：「送啲IT產品畀佢就得，我啲同事就有現金做禮物。」
盼收大鑽石
問到Kelly自己想要甚麼聖誕禮物時，她指着手上的巨大黑色戒指說：「好似咁大粒嘅鑽石戒指啦，願望唔一定要達到嘅，我唔敢同老公講呀，自己買啦。」
Kelly透露曾掙扎新年倒數是否要接工作搵錢，她說：「同事勸我話倒數時個仔都瞓咗，唔知你做乜嘢啦，我咪決定搵錢囉，我老公都唔想同我過啦，佢咁多朋友，又隊又飲咁，我又唔同佢隊嘅。」談到逼老公戒煙，Kelly無奈地說：「未成功呀，我乜嘢招數都用晒，都唔得，由佢決定啦。不過佢都好自律，唔會喺個仔面前食。」
有子萬事足的Kelly表示等之前剖腹生產的傷口完全復元後，始考慮再生第二胎，她說：「又劏過想我死咩？下一劑我都係要劏o架，自然生好驚o架，屙出嚟好痛好恐怖，開刀恢復時落床都已經恐怖到爆啦，真係各有各驚呀。」
採訪：胡比 攝影：陳志嵐