【北京直擊】王菲同李亞鵬成立嘅「嫣然基金會」噚日喺北京舉行記者會，李亞鵬喺會上宣佈一年一度嘅慈善晚宴將於下月18日喺北京舉行，屆時會舉行拍賣籌款，善款會用嚟興建嫣然天使基金兒童慈善醫院。
雖然噚日王菲冇嚟，但今年擔任嫣然天使基金新召集人嘅周潤發夫婦就畀面出席，發哥一嚟到就搞吓gag，指住隔籬張空凳話：「她（指王菲）騙我來，自己卻沒有來。」又話自己係王菲嘅fans，希望遲啲同佢合作拍番齣電影，但講明唔「侵」李亞鵬玩，真係識搞笑。
「與媒體關係差」
對於發哥盛意拳拳嘅邀請，李亞鵬就一碌木咁冇回應，之後記者追問王菲會唔會復出，李亞鵬忽然黑面神上身，淨係爆咗兩個字「閉嘴」。後嚟記者又問佢囡囡李嫣會唔會出席晚宴，李亞鵬只係答「不會」就算，搞到氣氛極為尷尬，連發哥都有啲愕然。事後問番發哥對李亞鵬有乜嘢印象，佢實話實說：「印象他就是和王菲結婚，還打過香港記者，與媒體的關係很差。」
李亞鵬咁火爆，相反王菲就善解人意得多，聽聞佢夜晚仲親自請發哥發嫂食飯洗塵㖭。