陳鴻烈在處境劇《畢打自己人》擔重頭戲，劇情本講述黎耀祥等無間道混入金波集團搜集其罪證，惜烈哥遽爾離世，據知劇本將改為交代他神秘失蹤。昨日《畢》演員懷着沉痛心情開工，監製羅鎮岳到場慰問，黃子雄表示見到烈哥在劇中坐開的大班椅，仍感覺他並未離開。
陳鴻烈一去，本來明年初才作結的《畢打自己人》，劇情也將完全改寫。據知劇組決定更改劇本，由原定大閆生要鋃鐺入獄，改為離奇失蹤，至於其去向則由劇中人以對白交代，據知《畢》劇現存尚有烈哥一星期存貨左右。
入廠氣氛甚沉重
至於劇中演員昨日懷着沉痛心情開工，原定沒有烈哥戲份，只有毛舜筠、黎耀祥、謝雪心、何守信、郭少芸和黃子雄等拍家庭場面。由於沒有群戲，場面頗冷清，眾人均神情哀傷。
拍攝前監製羅鎮岳特地到現場探班，安撫眾人。飾演毛舜筠母親的謝雪心接受電話訪問時說：「今日氣氛好沉重，我同毛毛仲手拖住手互相支持。聽講烈哥嗰日諗住去一廠打牙骹，我嗰陣都喺一廠，估唔到已經同佢傾唔到偈喇。」心姐又謂烈哥為人風趣，早前在台慶夜扮貓王唱歌，完騷後表示覺得自己這個造型很俊朗，故捨不得脫下頭套。
至於飾演大閆生未來女婿的黃子雄則說：「廠景入面有張大班椅，烈哥坐開嘅，我哋入到去見到，都覺得烈哥仲坐喺度。」至於《畢》劇劇情如何修改？他說：「已出嘅劇本改為交代大閆生出埠，至於未出嘅就仲未知。」至於祥仔就表示與烈哥幾乎天天拍對手戲，彼此就像家人一樣，故如今心情十分沉重，他說：「本來拍多個幾月就煞科，毛毛仲話要搵日出嚟食飯慶祝，可惜烈哥已經出席唔到。」
郭少芸泣不成聲
此外，黎耀祥昨日接受商台電話訪問，他表示事發前和烈哥拍對手戲，未覺他有任何不妥，又謂昨日曾致電飾演烈哥女兒的郭少芸，她在電話中泣不成聲，祥仔說：「烈哥份人好講得笑，有時我哋笑佢廣東話唔正，佢唔介意仲笑得最大聲，又有人笑佢似係法國佬，因為佢講廣東話好似講到法文咁。」
採訪、攝影：比華利、楊潔雯、駱華齡
全城哀悼：華仔年年BodyCheck
「大閆生」陳鴻烈疑因心臟病發前日突然去世，不少人才剛在台慶夜及處境劇《畢打自己人》看到他的演出，故對其猝逝感難以接受，也令不少人更重視健康。
劉德華
我未同陳鴻烈合作過，但聽到消息好愕然。我每年都有bodycheck，大check就兩年一次。我公司某啲職位嘅員工都要每年畀身體報告我，父母都會定期check。我係遺傳膽固醇高，我好鍾意食麥皮，家有少少對奶敏感所以食少咗。
薛家燕
台慶當晚佢坐我隔籬仲不停講嘢，好好傾，所以話健康係最重要。我之前病都有一刻諗過會唔喺度，但心臟呢樣真係冇法子。工作方面，最緊要睇身體可唔可以負荷，咁上下年紀都不宜太辛苦。
袁詠儀
我印象中佢份人好開心，做呢行就算唔煙唔酒，工作都唔定時啦，家好多病都年輕化，我家都會檢查身體。
一網講盡：2萬網友同悼大閆生
陳鴻烈前日因心臟病發猝逝，令無數影迷惋惜，有網民在Facebook網站設立「為藝人『陳鴻烈』作最後致敬」群組（圖）來悼念。至昨日為止，已有近2萬人加入群組。另一方面，有網民將陳鴻烈日前為台慶表演的照片改圖，好讓大家緬懷他的精采演出。
