去年大舉肆虐港股、俗稱「Ikillyoulater」嘅Accumulator（累計認購期權合約），原來唔止城中大孖沙中伏，內地一樣有苦主，但佢哋叫呢項產品為KODA，即係KnockOutDiscountAccumulator，玩法萬變不離其宗，好容易「贏粒糖輸間廠」。今年7月喺北京正式成立嘅KODA香港銀行受害者聯盟，噚日一行十人南下來港，向金管局投訴要求討回公道。
身為內地執業律師嘅聯盟主席賴建平話，聯盟有逾百名成員，主要來自北京、上海同深圳，每人平均因沾手KODA蝕咗5000萬銀，夾埋有成五、六十億咁話。佢形容，KODA仲衰過去賭，銀行欺騙咗客戶嘅信任，所以好唔忿氣，寫咗一封19頁紙嘅申訴信，要求有關當局正視問題。今鋪睇吓當局點回應嘞！