五區總辭、全民公投如箭在弦，民心所向，想話停一停都唔係開句聲就可以急煞車。全力催谷公投嘅社民連早幾個星期已經喺網上招兵買馬，呼籲市民報名做義工，幫手做補選嘅選舉工程。據知初步反應唔錯，已有約50人響應，有中學生未夠秤登記做選民，冇份喺公投中投票都表態想加入，社民連12月5號會舉行首次義工大會，吹雞起「義」。
有一定口才助嗌咪
呢個義工大會由長毛親自主持，暫訂會傾吓如何搞呢次選舉工程，如果有更多人報名，可能會初步討論分配工作安排，社民連副主席陶君行話，其實已有少數義工開咗工，上街向市民派發社民連解釋五區總辭、變相公投嘅政治說帖。
至於下一步工作，主要係在各區設立街頭宣傳站，目的係動員市民投票，所以義工最好有一定口才，可以企街嗌咪，當然，幫手派單張、搬搬抬抬嘅人都唔少得，一旦開始選舉造勢，估計要數以百計義工出動先得。
街頭只係選舉戰場之一，家陣係網絡年代，網上政治動員亦係兵家必爭之地，所以更歡迎呢方面專才加入義工行列，可以負責構思、製作海報、剪片、配樂等，以便透過互聯網發放短片；網絡文宣同喺各大討論區回應網民，鼓動風潮都係十分重要工作，網民「改圖組」都有用武之地，因為玩改圖係網上政治宣傳基本動作，擅長改圖者大把機會顯身手。
除咗上街宣傳，社民連都想搵機會去校園宣傳五區公投理念同實際如何操作，所以歡迎各學生會、大、中、小學教師搵佢哋。
12月9號提出動議
社民連話畀多一個月時間民主黨考慮是否參加總辭，實際可能冇咁多時間，因為毓民12月9號會提出動議辯論，呼籲全港市民支持五區總辭、全民公投，由於屆時民主黨仍未召開會員大會，意味民主黨立法會議員面對呢個辯論題目都十分尷尬，好有可能成為支持與反對總辭嘅超級口水戰。一直對總辭不以為然嘅李華明話，民主黨議員當日一定會踴躍發言申明立場，唔會迴避大是大非嘅問題。
mailto:[email protected]