有「京城名嘴」之稱嘅國務院副總理王岐山，個人魅力一向沒法擋，7月底訪美期間，手中把弄總統奧巴馬餽贈嘅親筆簽名籃球，已令外國媒體眼前一亮。呢位有「救火隊隊長」美譽嘅拆彈專家，喺十年前臨危受命擺平粵海爛賬攤子，本地賓架界早留低深刻印象，噚日佢高規格接見「每年一造」到訪嘅銀行公會代表團，暢論環球局勢，言辭鏗鏘，獨腳戲歷時一粒鐘，但據聞全程絕無「眼瞓位」，餘音震懾全場，繞樑三日咁話。
呢次由金管局新舵手陳德霖帶隊嘅銀公訪問團，不過可能陳總新官上任，一貫審慎行事，牌面上披露嘅會面內容就相當四平八穩，唔知閂埋門係咪精采絕倫呢？