特區政府聲稱施政要有透明度，所以預計喺2011年落成嘅添馬艦立法會新大樓都會主打透明開放，會好似家陣一樣畀市民旁聽，盡覽議員開會眾生相，換言之要瞓覺、上網都一目了然，比較唔同嘅可能係安全度高咗，事關基於保安理由，例如防止旁聽市民向議員丟雜物，會加裝玻璃幕罩住整個會議廳，呢個建議獲得警方同保安局同意，即係話議員日後就好似喺個巨型金魚缸入面開會，場面都幾有趣。
新大樓顧問建築師葉青雲噚日就話，大樓內部裝修會以綠、紫同灰色做主，綠色代表清新，紫色象徵高貴，灰色寓意有商有量嘅討論空間。公民黨黨徽都係綠、紫色，八方相信公民黨應該最支持呢個選擇。
大樓除咗有會議廳，亦會設有禮品廊、圖書館、教育廊以及有關立法會歷史嘅展覽，甚至會有眺望維港嘅觀景廊同花園，市民可以自由出入。