批評人，唔只要言之有物，有時若然適當地將之低調處理，效果可能會更理想！球壇智者、阿仙奴領隊雲格，在歐聯賽前記者會上，罕有地就傳媒提問禾確特喺世盃決賽周踢國家隊機會時發爛渣，其實佢係要將矛頭直指呢位英格蘭明日之星，希望佢發奮成才，唔好成日做病貓，白人工。今天我捧「狼堡」禾夫斯堡，希望佢哋去到嚴寒嘅俄羅斯，唔會變病貓。
禾確特以過千萬鎊加盟兵工廠多年，最令人印象深刻反而係上年9月對克羅地亞嘅世界盃外圍賽入3球，踢太公波咁勁；而喺支薪畀佢嘅兵工廠表現唔算差，但成個「藥煲」咁，傷多過踢，有負雲格厚望。
雲格連加拿斯都容得下，只低調地上季中褫奪佢嘅隊長臂章，今次罕有地借題發揮；拆局去睇，上仗敗走新特蘭，比賽節奏罕有地被牽住走，難得呢位20歲後生仔傷癒擔大旗，加上球隊已傷兩鋒，當然希望禾確特嘅速度帶起成隊波，矛頭直指嚟緊周日要必勝車仔嘅大戰。
串愛華頓贏病「虎」
返工成日做病貓被歧視，今日推介嗰隻「狼」禾堡，上季捧走德甲錦標後，今季表現尚可，今場作客俄羅斯對莫斯科中央陸軍，看過後者主場對半力紅魔照輸，加埋喺國內成績，唔係叻到對德甲冠軍可以讓波；串多注，信愛華頓作客贏病「虎」侯城。（下次見報日：周六）
文：Leung
簡介：不理盤路，不信陰謀論，最重勤力睇波，跟足軍情，吼準一擊。
今日精選
星期三3禾夫斯堡勝（3.3）
星期三3禾夫斯堡勝[+1]（1.75）x
星期三11愛華頓勝（1.95）2x1
簡評：歐聯早場有心水