球員要投效一支球隊，通常都會睇吓羅致球會開出嘅條件，例如周薪幾多，贏波獎金點分配等，當然亦好睇嗰間球會有冇爭標能力；好似羅賓奴咁，就算曼城出到幾高薪，都有傳呢位巴西球星會過檔巴塞隆拿。不過，埃及「法老王」沙基唔願投樸茨茅夫，完全係出於種族理由。
阿、以兩國成世仇
球迷應該都仲記得上季外借至韋根，季初頻頻入波嘅沙基，最近佢就獲得老樸班主阿法希姆垂青，希望喺1月份球員轉會市場重開後，羅致呢位埃及射手；但就被拒絕，理由係老樸隊中有阿爾及利亞同以色列職、球員咁話。
由於早前嘅世界盃非洲區外圍賽，埃及同阿爾及利亞為咗爭一個出線席位，搞到要踢到附加賽先分到勝負；而兩國球迷因為咁而發生爭執，襲擊球員巴士等，最後更成為仇人，結果埃及輸咗俾阿爾及利亞，兩隊球員亦從此好唔妥對方；而沙基就係因為老樸隊中有比赫積呢位阿爾及利亞國腳喺度，成為佢拒絕投效嘅原因之一。
話時話，埃及今次輸俾阿爾及利亞，冇得踢世盃決賽周，的確對士氣打擊極大；尤其喺最後一場分組賽都贏到對手，從而逼到阿爾及利亞踢附加賽，最後先輸，你話條氣點會順呀！
心頭高睇唔起老樸？
咁又關老樸嘅以色列球員賓希姆同總監格蘭事？原來埃及同以色列曾經因為西奈半島（SinaiPeninsula）主權爆發中東戰爭，兩國因而有牙齒印，所以沙基亦唔想同以色列人合作，所以成為佢唔投身法頓公園球場嘅另一原因。
不過我求大俠就對「法老王」抱懷疑態度，到底佢係咪咁有民族情操？皆因沙基都出名心頭高，韋根試過佢之後都想正式簽約羅致旗下，但就俾沙基所屬球會薩馬歷卡獅子開大口，個人條件亦傾唔成，因而告終。家「法老王」話晒喺英超響咗朵，點會加盟一支包尾球隊呀？計我求大俠話，沙基係睇唔起老樸至真！