少年輕狂，陳鴻烈在邵氏全盛期家住窩打老道山，跑車與女友經常不同。七十年代與台灣女星潘迎紫結婚，其後女方提出離婚，之後卻力數陳為負心漢，令他遭台灣傳媒封殺，一度棄影從商。
鄭佩佩「應該鍾意我」
離婚後陳鴻烈將物業財產全交前妻，他不諱言其後曾有過一段荒唐歲月，「嗰時我冇去追女仔，因為我性格好被動，但我可以使錢，我可以請一大班女仔飲酒，飲完酒鍾意嘅咪一齊走囉！唔喜歡都可以各自返屋企，但我一定唔會去呃呃騙騙，玩完就拋棄，呢種事我一定唔會做。」
87年再婚，妻子徐世榮比他小19年，婚後誕下一子一女，長女現年22歲，幼子12歲。妻兒長居台灣，陳鴻烈與胞妹則住在油麻地永星里，方便工作。「其實我好喜歡家庭生活，我太太喺台灣幫我打理好屋企，佢對我好信任，咁對男人嚟講係一種福氣，我一有時間就會返去探佢哋。我有一個好幸福嘅家庭，呢啲都係我嘅幸運。」
陳鴻烈與岳華曾是邵氏小生，同期出道拍《大醉俠》，不約而同情傾該片女主角鄭佩佩，多年後陳鴻烈笑說：「緣份冇咗就冇，我覺得當年佢都應該鍾意我嘅，但好多事要講緣份。」