香港證券業協會噚晚舉行30周年誌慶酒會，喺呢個「而立」之年，正正係內地券商大舉進軍香港嘅開始，協會啱啱換屆，新紮嘅副主席繆英源（Benny），就係招商證券香港董事常務副總經理。
今年坐正主席嘅李耀榮（圖），佢係大福證券（665）行政總裁，公司被內地海通證券收購，銜頭待變，點知一講起新東家，佢就借影相行開，幾經辛苦先話海通唔會提高每股4.88元嘅收購價，而完成後高層同員工數目維持不變。Benny亦話作價合理，市盈率只係17倍，低於內地同業嘅30倍。
詹培忠見李福兆 非為東亞
證券界年初至今否極泰來，大會請到幾位重量級人物飲番杯，好似老行尊董偉，港交所（388）現任行政總裁周文耀、下任總裁李小加，以及中銀國際副執行總裁謝湧海等。「金牌莊家」立法會金融服務界議員詹培忠匆忙到賀，佢話約咗短暫回港嘅李福兆食晚飯，但就肯定唔係為咗李氏家族東亞（023）保衞戰度橋喎。