電影中俗稱EU嘅警察衝鋒隊成日衝鋒陷陣，現實中EU唔只要睇得仲要打得，呢個月6號警隊就舉行咗停辦16年嘅「衝鋒隊挑戰賽」，各總區嘅110名EU人員要喺「戰術性拯救」、「點三八手槍戰術接力賽」、「MP5輕機槍裝嵌及射擊」同「AR15來福槍射擊」四個項目一較高下。
所謂「戰術性拯救」賽，參加者要攞住撞門鎚等工具，同着住俗稱「黑人衣」嘅個人保護裝備，喪跑800米拯救人質。但戰況最激烈嘅係AR15來福槍射擊，要打附加賽先分出勝負，最終新界北總區奪得全場總冠軍。
由於港島總區已經答應明年主辦呢個EU挑戰賽，唔使再等多16年去到2025年先再辦，快過普選。