敗犬大家聽得多，敗龜聽過未？據講敗龜係古人用龜板占卜後剩餘嘅遺物，剩番唔好嘥，於是用來入藥。
點解叫「敗龜」？有研究話係源自「拜龜」嘅諧音。香港地賣到成行成市嘅龜苓膏，主要成份就係拜龜嘞，原來你同我都係靠食拜龜先咁青春無敵、氣行血活。
敗龜嘅製成品大家見得多，原料就少見。香港龜苓協會最近主辦咗個「龜苓膏文物展覽」，展出龜殼、敗龜板、土茯苓等藥材，又有熬製龜苓膏嘅大鋼爐，仲會公開龜苓膏煎製秘方。展覽地點喺創業過百年嘅恭和堂油麻地吳松街分店，恭和堂第二代傳人嚴國雄唔止拎啲私己敗龜出嚟益街坊，仲有好多私人珍藏古玩，將會擺喺恭和堂各分店巡迴展覽。