花旗股市前晚大幅反彈,諗住港股班好友可以喺期指結算前再下一城,點知突然傳出內地要銀行提高資本充足比率,即係話大銀行好可能要喺市場大抽水集資,港股隨即腳軟,恒指前日上升的315點一筆勾銷。恒指10日線再度失守,不過期指結算逼近,好友應該會守住條20日線。
國航C輪17994:中國國航(753)昨收5.46元,逆市升3.2%,試完10日線之後咁醒神,升破6元會向7元進發,可以諗吓隻C輪17994。
隻輪現價22.6仙,2011年5月30日到期,行使6.80元,溢價65.9%,引伸波幅101%,槓桿率2.4倍(有效1.6倍),正股升上7元,17994有機見33.5仙,接近5成升幅,如果正股跌穿4.80元,就沽咗隻輪止蝕。
俊樺