香港董事學會一年一度嘅十大最高企業管治得分上市公司，以及傑出董事獎得主，噚日正式公佈；據領導呢次調查嘅浸大教授張仁良介紹，今年得獎嘅上市公司有一大特色，就係當中唔少係國企股，反映香港作為國際金融中心，真係可以協助內地企業提高公司管治水平o架！
金融業管治水平最高
喺眾多上市公司中，張仁良話，公司管治水平較高嘅行業係金融業，較差嘅係地產業，據佢分析，因為地產股股權較集中，多數係家族式經營，而且關連交易嘅披露相對較少。
董事學會嘅調查顯示，舊年本港上市公司嘅企業管治水準有輕微改善，但喺對股東公平待遇問題上，問到「公司是否有機制允許中、小股東影響董事會任命」時，調查就話只有10間公司表現優異，多達136間有待改善。調查話應容許小股東提名獨立董事。
今年最高分企業管治獎，除咗有中電（002）、滙控（005）、港交所（388）同港鐵（066）繼續冧莊外，其他新獲獎嘅包括工行（1398）、中行（3988）、江蘇寧滬（177）同中石化（386）四家國企，仲有華創（291）及恒隆集團（010）。至於傑出董事獎，藍籌股由中移動（941）董事長王建宙同思捷環球（330）副主席鄭明訓獲獎。中旅國際（308）執行董事總經理許慕韓同中國建築（3311）副主席周勇，就喺非藍籌嘅上市公司類勝出。
李華華
mailto:[email protected]
最高分企業
工商銀行、中國銀行
傑出董事
