《刺客教條2》玩新主角！殺手新丁Ezio喺文藝復興年代邊學邊做，更多武器更多道具仲識得玩古代滑翔空中飛人，背後功臣原來係發明家——達文西！呢位主角老友除幫手發明裝備外，閒時仲會搞吓爛GAG，仲唔係聞西上身。
文：阿洛
有仇必報學殺人
由風格到主角造型都同上集相當類似，不過其實改動好多；首先，主角已經唔係上集嗰個，舞台都唔係十字軍東征時代，而係文藝復興年代嘅意大利。今次主角又係用高科技回到刺客年代，名叫EzioAuditore呢位後生仔，某日回到家時發現老竇同細佬被絞殺身亡，而自己則成為通緝犯，惟有投靠掌握強大傭兵勢力嘅叔叔，邊學邊做刺客，復仇之火爆發。
偷錢收o靚越學越壞
上集有口碑，唯一缺點係關卡重複耐玩性較弱；今次改善就好大，而且仲多咗好多支線，除刺殺報仇主任務外，仲會有幫助鄉民、賺錢建設等副任務。而且城中嘅小偷同舞女都可以花錢僱用，可以叫佢哋撐場或者故意製造紛爭引開敵人注意。而且更可以扔錢引途人執，引起混亂，至於錢從哪裏來呢？就係靠偷，行近居民就可以偷錢，不過偷錢偷得多就會被人追數，蠱惑招要適可而止。
更多架生更多玩法
主要玩法始終係明打暗殺，武器今次除匕首、袖劍外，仲有飛刀長劍等。除閃到敵人後面刺殺外，仲可以匿喺稻草入面，失驚無神拮人一刀，加埋飛躍刺殺、拉人落樓等動作，都夠晒刺激。雖然今集繼續唔可以連線合作或對戰，但就可以同PSP版嘅《Assassin'sCreedBloodlines》連動，暫時已知係玩家可以喺兩版本之間進行金錢、寶物等交換動作。
ASSASSIN'SCREEDIIProfile
遊戲：《刺客教條2》
機種：PS3、XB360、PC
製作廠商：Ubisoft
類型：動作
人數：1人
