公立醫院近期發生幾單證實或者懷疑風化案，最轟動嘅係屯門醫院急症室醫生羅仲康非禮女病人被判監。八方聽聞，近期廣華醫院內部又傳緊一單，話有個女護士一個月內被個男醫生摸patpat兩次。院方話冇收過投訴，但醫院裏面就傳到繪聲繪影，好多人都聽過個古仔，仲講到話個護士曾向病房經理投訴，點知俾人問番：「你乜嘢新絲蘿蔔皮呀？」
女護士兩被摸臀
根據個傳聞，呢單廣華醫院非禮事件大約發生喺一個月前，據講第一次發生喺手術室外通道，有個女護士幫病人核對資料期間，有個醫生行過，女護士覺得有人用手揩咗佢patpat一下。女護士初時以為通道窄，個醫生可能係無心之失，所以冇追究。點知第二次當女護士喺手術室嘅復蘇室做緊嘢，同一個醫生行過時，又懷疑用手摸咗佢臀部一下。
女護士覺得好唔妥，當時環境唔算窄，個醫生冇理由一而再咁唔小心，不甘受辱下向病房經理投訴，點知反而畀話返轉頭：「你乜嘢新絲蘿蔔皮呀？唔好亂講！」之後佢再向部門主管投訴，因為冇證冇據唔受理，事件不了了之。女護士於是喊咗一場，仲向同事哭訴。
以上就係近期喺廣華入面口耳相傳熱烈討論嘅非禮疑案。八方作為專業嘅新聞工作者，第一時間向廣華醫院查詢，院方回覆話，冇收過員工類似投訴，仲強調院方一向重視員工福祉，如果員工有投訴，一定會認真處理同採取適當行動咁話。
涉嫌者斯文醫生
事件孰真孰假至今冇人知，事關冇人報警，冇人向護士團體求助。不過醫院中人話，雖然唔係親耳聽到個女護士話俾人非禮，但傳聞中嘅女事主喺廣華做咗好多年，份人好老實，覺得空穴來風，未必無因。不過亦有塘邊鶴話，被指涉嫌非禮嘅醫生同樣冇前科，一向斯斯文文，仲叫八方唔好寃枉好人。
八方只能奉勸各位姊妹，如果真係俾人侵犯，一定唔好啞忍！
mailto:[email protected]