要用3日篇幅講崇明島，除咗幫讀者上一堂地理課之外，亦畀大家一個機會多多了解幾隻內房股前景，原來仲有一樣秘密武器，唔買都要睇吓。講緊係崇明島另一大島主上實集團，即係上海實業（363）嘅好媽媽。叫得上實集團，上海大型發展計劃又點少得佢嗰份，噚日講過白高敦訪滬時，簽咗合作發展備忘錄，實情就係同上實集團合作發展崇明島東灘項目。
所以話，商業利益掛帥，乜嘢濕地環保都拋諸腦後，家睇落好靚嘅一大片濕地，世博過後肯定變天，因為上實早已同愛爾蘭最大房產商財富控股合作發展東灘。雖然未有發展細節，但睇地理環境，潛力認真唔差。話說上實集團喺東灘有86平方公里地，首期預計發展420萬平方米，54%作住宅、46%作商用及民用，包括酒店、學校及醫療設施，預計第一期可供約8萬居民居住。
儲貨等阿媽注資
能夠以生態島去包裝，環保概念講得都幾誇張，發展商話島上主力使用再生能源，其中40%來自風力、20%用太陽能，其餘40%利用農作物發電。據了解，到時喺生態城入面唔會有高過8層樓嘅建築物，屋頂會有草坪做隔熱，減少開冷氣，而垃圾會再處理成肥料同燃料，希望結合太陽能、風電等可以做到自給自足。
呢啲巴閉概念聽吓就算，最緊要係話到時有40%空間可以起建築物，即係可以用34平方公里起豪宅，其他則用作高爾夫球場、馬術運動中心、人工海灘等。聽到呢度，大家腦裏應會出現一個類似高級版珀麗灣嘅特大型地產項目。
上海實業亦係去年開始靜靜地賣嘢，部署變身內房股。先係去年7月，向阿媽賣中芯國際（981）8.2%股權套現11億元；跟手賣埋A股光明乳業，又袋9億元。然後一個屈尾十，向阿媽買番豐茂置業及上海豐啟置業全部股本，變相注入青浦區朱家角鎮3幅地，發展為低密度住宅物業。
按照好嘢益阿仔，輸錢嘢畀番媽媽嘅傳統，東灘呢塊肥豬肉好有機會注入，幾時注入唔好問我，但慢慢儲吓等收成就肯定冇錯。
胡孟青