女青河蟹會長梁黃文璿早前被揭違反大會規定，逾期擔任會長，賴死唔走，經過抗河蟹聯盟一輪窮追猛打，女青董事會終於知醜，決定河蟹會長冇得留低，噚日公佈最新嘅會長同副會長人選，總算係有啲轉變。踢走咗河蟹會長，新會長由胡秀霞接任。
胡秀霞接掌
接掌的胡秀霞原本係女青副會長，家亦都係紅十字會副主席。聽聞佢都係梁黃文璿其中一個屬意嘅接班人。女青新領導層當中，另一個值得留意嘅就係由選任董事升呢出任第四副會長嘅靳羽珊，佢來頭唔細，係梁黃文璿個新抱。所以河蟹會長雖然退下領導班子，但係影響力猶在。
河蟹事件搞到社福界滿城風雨，會長就算攞到銀紫荊，都要問責下台。不過，事件主角民政事務局局長曾德成地位依然穩固。搞到過千社福界員工上街，河蟹曾似乎都唔使對事件問責，相信抗河蟹聯盟依然會有排忙。