人氣台慶劇《宮心計》嘅「三好」佘詩曼近日人氣高企，難怪新聞不斷，早前有傳佢搭上神秘富豪，所以俾人影到阿佘睇豪宅，咁啱佢前日罕有咁以一身闊太打扮現身馬場，身邊仲有雅芳婷老闆、馬主許章榮，難怪會惹人聯想，不過阿佘就解畫話係代言公司嘅老闆名下愛駒出賽，佢獲邀出席啫。
阿佘近日的確心情靚爆，噚日佢着tubedress出席喺將軍澳舉行嘅聖誕亮燈活動，大會安排一班可愛小天使陪佢，仲搵咗3個戴住鄭嘉穎、陳豪同黎耀祥面具嘅猛男，分別揸住鮮花、后冠同獎項畀阿佘揀，搞到佢鬼咁開心，結果阿佘揀咗送后冠嘅翻版陳豪。
唔驚爆劇情
事後問阿佘點解唔揀翻版鄭嘉穎，佢話：「呢排因為《宮心計》勁hit，所以梗係揀皇上，況且我都好想回味戴后冠嘅滋味，畢竟都係10幾年前選港姐嘅事。」大會仲好識做咁形容阿佘係準視后，阿佘笑笑口話：「可能人哋係話我準時。」對於最近頻頻被爆劇情，阿佘話：「一日未播出街，一日都未知真定假，所以點都有人睇。」阿佘又話諗住約埋楊怡同陳豪齊齊請食飯，不過因為大家都忙拍劇，所以度期好難。有記者提議不如喺頒獎禮之後當慶功，阿佘笑話：「都好喎！咁要叫埋雯女同靚靚，睇吓佢哋邊個攞獎先。」
至於《宮心計》收視仍然高企，上星期平均收視35點（223萬人），最高收視38點（242萬人）。