馬主協會設周年晚宴，在君悅酒店有三十幾圍，好多馬主、練馬師出席，馬會高層當然唔少得。大概左丁山久唔久就寫吓馬場逸事，呢晚一位馬主突然捉住左丁山問：「喂，某報副刊開咗一個新專欄叫做『五樓廂房』，寫好多馬圈八卦，係唔係你又開多一個欄呀？幾位馬主朋友都認為係你寫嘅噃？」
唉吔，又關我事？中環經常有人以為左丁山即係《壹週刊》嘅宗菁華，不時埋怨幾句，你估左丁山有三頭六臂咩，可以寫咁多篇稿，宗菁華乃真正高人，叻過左丁山幾十倍，豈敢高攀，家又誤會左丁山用其他筆名在某報寫稿，真係寃哉枉也。謹此聲明，左丁山並非宗菁華，亦非鄭多多。
晚宴上當然見到唔少熟人，坐在漂亮女強人董事Q之旁，乘機投訴：「去泰國買機票要周圍撲喎，點解班班機客滿？」董事Q答得妙：「咁咪去日本囉，不愁沒有機票。」左丁山話：「日圓咁貴，去泰國夠平吖嘛！」董事Q話：「咪係囉，香港人最識計數，知道泰國價廉物美，逢周末、假期就湧去曼谷，梗係冇機位啦。你去東京啦，北海道啦！」唔係話唔想去，但諗吓日圓幣值，暫時冇乜興趣咯。
因為要早起身，吃完頭盤就想告辭，點知副局長H啱啱趕到，唯有坐番低招呼副局長，佢話晚晚趕兩場，唯有遲到，好抱歉，冇計啦，做得呢個位，就預咗一年要食七百餐晚飯，如果唔就住就住，好容易變成肥婆一名。以前何醫生變成何局長之後，身形立即膨脹近一倍，幾快見功呀。不過副局長H係得喎，眼見冇肥到，同以前做賓架H嘅樣，完全相同，真懂得「收身」之道！
飲埋湯，冇法子咯，趕住返屋企，打開電視睇BBC，竟然係夏佳理接受訪問，節目名HARDtalk，主持人毫不留情猛咁窒港交所既係上市公司，又係監管機構，直情有利益衝突，好彩夏佳理係好辯律師出身，一於頂住，彼此一攻一守，乃近來罕見嘅精彩電視訪問節目。英國人成日以為香港金融監管不力，制度聽命北京，偏幫大財團，其實佢哋出咗RBS，NorthernRock呢類大黑洞，害死投資者，英國監管直情差過香港好多，有乜資格以為自己威啲嚟批評我哋呀？