迪科爾幫熱刺喺前日大炒韋根9:1場波大發神威，效法兩大英超「入球機器」高爾、舒利亞完成一場波入5球嘅壯舉，仲以11球搶走埋費蘭度托利斯（費托）嘅射手榜領先地位。佢咁威，除咗要多謝韋根條豆腐防線、不斷為佢供應嘅艾朗連儂外，原來背後仲有個「軍師」要多謝，佢就係前英甲（當時頂級聯賽）神射手基夫阿倫。
基夫阿倫：你咪換砵
迪科爾賽後講番成個古仔：「我賽前忽發奇想，一心想轉用贊助商（3間）提供畀我嗰對綠色新砵，但就喺呢個時候，球會助教基夫阿倫叫我咪亂嚟，於是我着番對銀粉色波砵，結果就入5球。」
如果80年代中已經睇英國波，而唔識基夫阿倫嘅話就真係好打有限。話說佢係86/87球季得熱刺隊友荷杜、華度、阿迪尼斯等人不斷供應，以33球榮膺英甲神射手，假如今季因為呢個前英格蘭頂級聯賽神射手，幫迪科爾爭到今季英超神射手，都算係薪火相傳。
查實英超球季一半都未夠，雖然咁早估最終神射手獎誰屬有啲嘥鬼氣，但起碼知緊隨其後嘅費托（10球）、杜奧巴（9球）、尹佩斯（7球）家陣都養傷，而迪科爾舊隊友戴倫賓特（9球）效力嘅始終係中游球隊新特蘭。所以話，迪科爾初步睇真係有一馬當先之勢。外國博彩公司已列佢為4倍神射手大熱門，費托同杜奧巴就4.5倍並列次熱。
哈利列納：可入20球
領隊哈利列納就好睇好迪科爾贏神射手：「點解唔得？佢喺操練時真係好『弗』，係時候一季射入20球，贏埋神射手。」攞獎重要，但對迪科爾嚟講，最緊要係國家隊領隊卡比路有留意佢今次壯舉。放心，以卡比路平時親力親為又勤力嘅作風，應該唔會睇漏眼嘅。