會計師公會噚日公佈「2009年度最佳企業管治資料披露大獎」，鑽石獎兩位得主係中電（002）同埋機場管理局，中電已經連續第7年奪得鑽石獎，機管局都唔弱，係連續第5年嘅得主。
中電年報奪獎，今年唔係首次，本月初已先聲奪人，攞到香港管理專業協會最佳年報獎。會計師公會今次表揚中電，讚佢年報強調推行自願資料披露嘅重要性，例如就風險管理、董事、管理層薪酬政策、持續發展等方面都會各自編製獨立報告，值得表揚。其他公司想提高集團年報同企業管治水平，可向中電抄橋。
會計師公會會長PaulWinkelmann認為，本港上市公司同埋公營機構，可能要檢討挑選非執行董事嘅準則，特別係公營機構，必須加強透明度，喺年報中增加披露董事會嘅角色同貢獻。至於非執董、獨立非執董薪酬，佢話對比外國，本港嘅獨立非執董薪酬較低，但實際水平要由公司自己決定。