7月中跌傷頭入院留醫至今嘅賭王何鴻燊，聽日88歲生日，但相信要喺養和度過。賭王過往生日幾房姨太出盡法寶幫佢賀壽，今年三太陳婉珍話咗唔搞壽宴，四太梁安琪準備隨便切個蛋糕；惟獨二房節目照舊，就係善事照做。
二太藍瓊纓過去三年都喺賭王生日前後捐錢支持公益金嘅「賀禮捐公益」，幫賭王積福。「賀禮捐公益」01年推出，當時係由籌委會聯席主席何超瓊同媽打李麗娟推動，呼籲大家將喜慶日子收到嘅賀禮捐畀公益金。06年二房捐咗250萬；07年同08年又分別捐咗150萬。今日傍晚，藍瓊纓會同仔女超瓊、超鳳、超蕸同猷龍一齊捐錢，相信二、三百萬唔少得。